أهم مواقف حياتك

السلام عليكم

طبعا كل واحد فينا اتعرض فى حياتة لمواقف صعبة ومواقف كوميدية ومواقف تزعل ومواقف محرجة ومواقف تانية كتيرة

وبما اننا كلنا دلوقتى اصحاب واخوات جامدين أوى فانا شايف ان مفيش احراج وعاوزين نحكى لبعض أحسن وأصعب مواقف فى حياتنا

وعلشان متقولوش انى دبستكم و هربت انا هبدأ أول واحد فيكم:

أصعب موقف فى حياتى كان وأنا فى تانية ثانوى:
أنا هأحكى علية بس بشرط محدش يضحك عليا أو يتريق

أنا كنت بزوغ من المدرسة كل يوم بعد الحصة التانية من فوق السور أنا وأصحابى (وطبعا منهم شريف) علشان أروح أذاكر وأنا أصلا أخف أصحابى فكانوا بيطلعونى الأول وبعدين أستناهم برة لما يطلعوا بعدى

وفى يوم أسود ( كان فى الاسبوع الاول فى الدراسة ) بعد ما نزلت من على السور أنا واللى معايا واحد منهم ربنا يسامحة وقف شوية علشان بيكلم صاحبة ف استنيتة علشان أروح معاة وبعدين كان فى مخبر لابس لبس عادى خالص ماشى جنبى وفجأة مسكنى وقالى رايح فين طبعا أنا كنت خلاص هاموت من كتر الخوف وبعدين أخدنى وقعدنى فى البكس شوية أنا وناس تانية كتير ممسوكة بردة وطبعا فضلنا نعيط جامد أوى لأننا افتركنا ان كدة خلاص مستقبلنا ضاع المهم ان الظابط أخدنا للمدرسة عند الناظرة وطبعا احنا لسة بنعيط

أهم حاجة بقى فى الموضوع ان صاحبى اللى كان السبب انى اتمسكت واقف بعيد قاعد بيضحك عليا وكل ما المخبر يقرب منة علشان يمسكة كان بيطلع يجرى

المهم بعد مادخلنا المدرسة كان فى أستاذة واقفة مع الناظرة شافتنى وأنا بعيط فصعبت عليها وقالت للناظرة معلش سامحيهم المرة دى والكلام دة

نسيت أقولكم اننا كنا بنعيط علشان قالولنا ان الظابط اللى مسكنا دة بتاع أداب يعنى هيلبسنا قضية أداب

المهم من هنا لهنا الناظرة وافقت فى الأخر انها تسامحنا فرجعونا الفصل وسابونا ومن بعدها طبعا فضلت حوالى شهر مش بزوغ لغاية ما رجعتلى تانى الجرأة

طبعا انا أول حاجة عملتها لما روحت البيت انى غيرت البنطلون ههههههههههههههههه
محدش يفهمنى غلط انا بهزر بس واللة

دة كان أصعب موقف اتعرضت لية فى حياتى

أما بالنسبة لأجمل موقف كوميدى فى حياتى فهو الموقف بتاع جمصة اللى ماجد لمحلكوا علية بس أنا بصراحة مش هقدر أحكى علية

يلا أنا عايز أسمع بقى مواقفكوا سواء كوميدية أو صعبة أو أى مواقف تانية مميزة

السلام عليكم الاول
الموضوع جامد يا just_dream
انا مش هحكى علي المواقف الصعبة اصلها نكد قوى ومش قليلة
انا هحكى عن موقف لما بفتكره بحسن بالرضي عن نفسي
كان يوم نتيجة الثانوية العامة سنة ثانية
الاول امهد للموضوع عشان تكونوا معايا
في بداية السنة كان وفاة والدى-الله يرحمه-وطبعا زى اي حد اتأثرت بالحكاية دى قوى واخدت الكيمياء وقلت يارب اطول حتى حاسبات وكنت بشوف اصحابي اعصابهم مشدودة وتعبانين وانا مكبرة دماغي علي الاخر
وماما مش كانت متخيلة انى ممكن انجح اصلا وتقول يارب اي مجموع بس المهم نفرح ومحدش يشمت فينا
يوم النتيجة بقي مش جبتها من النت قلت اجيبها من المدرسة احسن وكانت اختى معايا
المهم المدرسة قالت لي مبروك جيبتى 97ونص قلت لها لا اكيد مش انا واختى قالت لها اكيد فيه غلط ونراجع رقم الجلوس وعملنا مشكلة ودى مش درجاتى والناس يقولوا ايه قليلة؟ لا يا ناس كتيره والناس قعدوا يضحكوا علي انا واختى
المهم قولنا بقي احنا هنسبك الموضوع علي ماما رحت قلت لها انا جبت 85 % قالت لي مبروك عليكى وعلي تجارة بس خليكى علمى وبعدين قلت لها ايه يا ماما دول 97 ونص قعدت تعيط من الفرح والحمد لله كملت احياء وحافظت علي مستوايا وبقيت صيدلانية علي وشك التخرج
يارب مش اكون طولت عليكم
يلا سلام مؤقت اشوفكم في موضوع تانى

السلام عليكم

أحلى و أجمل تحية لعضوة منتدانا الجميلة و دكتورتنا drnnonna

أحب أحيكى تحية كبيرة أوى على صبرك وتحملك للموقف الصعب دة واصرارك على انك تعملى حاجة فى حياتك بالرغم من الظروف اللى انت مريتى بيها

عموما البقية فى حياتك مع انها متأخرة جدا

بس بردة عاوزين نعرف المواقف الصعبة الا اذا كانت مواقف خاصة مينفعش تقولى عليها

ايه يا طارق مفيش غيري يعترف
فين ماجد وشريف ونينو


حياتك الباقية يا سيدى ولا يهمك وميرسي علي الكلام الحلو دا

اية ياماجد

فين مشاركتك ولا الماضى أليم أوى كدة

القسم ده فالمنتدى انا بحبه جداااا وواضح ان اعضاء المنتدى متفاهمين جدا مع بعض وخلاص معتش فى حد بيتحرج انه يقول اسراره الخاصه لانه حاسس انه بيقولها لناس بيحبهم وقريبين منه قوى وده كان الهدف الاساسى من انشاء المنتدى

بالنسبه بقى للموضوع اللى احنا بنتكلم فيه وهبدا الاول بالمواقف الصعبه اللى مرت فحياتى
اصعب موقف عدى عليا هو وفاة امى وانا ف 3 اعدادى ماما بالنسبالى مكنتش مجرد ام وبس لا دى كانت صحبتى اللى مكنتش بخبى اى حاجه عنها فحياتى الشخصيه وكانت دايما بتشجعنى على النجاح وانى اكون دايما احسن بجد انا افتقدتها جدا واتغيرت حياتى 180 درجه بعد وفاتها لان ملقتش الانسانه اللى تعوض حنانها او حد يهتم بخصوصياتى زيها
اما بقى المواقف الحلوه فحياتى فكان اول قصة حب بالنسبالى وكان ف 3 ثانوى بس للاسف الموضوع مكملش وانفصلنا مع انى حبيت بعدها واكتر من مره بس فعلا اللى قالو ان الحب الاول هو الحب الاقوى عندهم حق
ويوم نتيجة الثانويه العامه وعرفت انى هدخل كليه الهندسه ده برضه من اقوى المواقف فرحه على قلبى يومها كنت طاير من الفرحه
يعنى الحمد لله انا مبسوط فحياتى وربنا مدينى اصدقاء زى العسل واحنا زى الاخوات بالضبط ربنا يخليهم ليا

واضح انى طولت عليكم شويه وياريت ياطارق اكون رضيت فضولك ...... وكده يبقى باقى نينو