الصداقة بين الولد والبنت

موضوع: الصداقة بين الولد والبنت 2008-04-24, 12:00 am

انا هتكلم المرة دى فى موضوع يهم الاولاد والبنات وهو :

الصداقة بين الشاب والفتاة هل فعلا ما يوجد بهذا الاسم ولا ده اسم هما بيقولوه علشان يغطوا بيه على حاجات تانية؟

وهل نظرة المجتمع ليهم بتبقى ايه لما بيشوفوا ولد وبنت مع بعض؟

ويا ترى فيه اهالى بتتفهم موضوع الصداقة بين بنتهم وصديق ليها؟

وممكن الصداقة تتحول لحب او الحب يتحول صداقة؟

احب اشوف ارائكم الجميلة الى عودتونا عليها!!!!!!!!

جميل قوى الموضوع ده وكنا محتاجينه معانا فقسم فضفضه

وانا هرد عليه بنفس طريقة عرضه للموضوع كجزئيات

الاولى : من رايي ان فى فعلا صداقه مابين ولد وبنت ده عادى جدا وده بيكون لاسباب كتيره منها الزمالة
او انها تكون مثلا صديقة للعيله او معرفه وهو بيحبها بس مش اكتر من صديقه ...... كده يعنى

الثانية : موضوع نظرة المكتمع انا شايف انه معتش مهم دلوقتى بعد مالناس شغلت بالها بحجات تانيه غير الشباب والبنات
والدليل على كده الانتمه فالجامعه

الثالثة : اه فى اهالى بتتقبل وجود صداقة بين بنتهم وصديق مثلا من الجامعة او ابن الجيران بس مش كتير وده بيرجع لثقافة الاهل

الرابعة : اكيد طبعا اغلب الصداقات بين الولاد والبنات بتنتهى بحب وده بيرجع للتوافق اللى بيكون حصل بينهم كاصدقاء فبيكون جميل
ان الموضوع ينتقل لحب واكيد بيكونو سعداء قوى مع بعض بعد كده لان ففترة الصداقه بيكون كل حد فيهم فهم التانى كويس
وعرف اللى بيحبه واللى بيضايقه

ازيك يا love
الموضوع دا موضوع جيد للمناقشة تسلم

صداقة الولد والبنت موجودة ومش فيها حاجة
وان كنت شايفة انها لها حدود ومش زى صداقة الولد والولد او البنت بالبنت
(انا ليا صداقة عزيزة عليا مع ابن خالي بس بقابل حاجات مش بقدر اقولها له بالرغم من اننا
متربيين مع بعض وتقريبا من سن واحد ودا اللي بيخلينى اقول ان لها حدود مهما كانت)
وانت عندك حق فيه ناس بيغطوا بيها علي حاجات تانية او بيعدوا الحدود ودا اللي بيخلي المجتمع يبص ليها بنظرة شك دايما

الاهالي حسب ثقافتهم وحسب ماعاشوا ودايما بيكون خوف علي البنت اكتر من الولد
يعنى لما اب يعرف ان ابنه له صديقات بنات مش بيكون رد فعله لو عرف ان بنت لها اصدقاء ولاد
وهيا حسب الثقافة والمستوى الاجتماعى اللي الاهل فيه

بالنسبة بقي انها تقلب بحب مش دايما ومش لازم يعنى
وان كانت في معظم الاحيان بتقلب بس مش دايما

اولا انا مقتنع تماما انى فى صداقة بين ولد وبنت وبتبقى صداقة كويسة جدا وبيخافوا على بعض جدا لما تبقى صداقة حقيقة وبينصحوا بعض نصايح كويسة وممكن الواحد يقتنع براى صديقته عن راى صديقه وان كان فى ناس بتغطى على حاجات تانية باسم الصداقة لكن خلينا فى الجانب الكويس.

ثانيا نظرة المجتمع ليهم فى الغالب مش بتبقى لصالحهم لانهم لما بيشوفوا ولد مع بنت يقولوا على طول انهم فى علاقة بينهم مش بييجى موضوع الصداقة فى دماغهم وان كانت النظرة دى تغيرت كتير دلوقتى.

ثالثا انا اتفق مع ماجد و drnnonna ان نظرة الاهل بترجع لثقافتهم وتفهمهم للصداقة الحقيقية الخالية من مصالح او غرض تانى.

رابعا فى اوقات كثيرة الصداقة بتتحول لحب لانهم بيبقوا فهموا بعض كويس جدا وكل واحد عرف التانى على حقيقته اما ان الحب يتحول لصداقة فانا بشوفه صعب جدا لانهم طول ما هما شايفين بعض على طول مش هينسوا الحب الى كان بينهم ومش هيعرفوا يتعاملوا مع بعض كاصدقاء.