منتدى فضفضه ......طب ما نفضفض....؟؟؟؟

بما اننا في منتدى فضفضه
ما يلا نفضفض
كل واحد يقول اللي جواه
ويفضفض معانا
سره في بير صحيح علي النت والناس كلها شايفة
بس الاحساس نفسه ان حد يهتم بيك ويرد عليك وتشغل تفكيره لو لدقايق

يالا عايزة ردوكم بقي؟؟

ودى فكرة قسم فضفضه اللى عملناه علشانها وبما انك فتحتى الموضوع يبقى تبدئى انتى وتفتحيلنا قلبك

اوك انا موافقة وانتى بعدى علي طول

افضفض هييييه اقول ايه بس
انا نفسي ابطل قلق وابطل افكر كتير
مخنوقة من الدراسة والكلية
ومضغوطة في الامتحانات
خايفة من بكرة وبفكر في امبارح ومش عارفة اعيش النهاردة
نفسي حاجات كتير تتغير
انا تقريبا عايشة يعتبر لوحدى
ادعو ا لي ربنا يعينى ويساعدنى

انا الايام دى بسمع اغنية المحكمة بتاعة سيد الشيخ
(ياللي فاكر انك انت بس وحدك في العذاب لاتعالي في ناس كتيرة دا انت ورقة من كتاب قول يارب وهتلاقيه ......للاخر بقي كملوها)

عارفين انا اخدت وقت كبير علي ما جمعت الكلام دا
ماجد دبسنى بقي هههههههههههه
يارب اكون قدرت انقل لكم لو جزء من الصورة

واللي انا نفسي فيه الوقتى بجد

نفسي حد اترمى في حضنه واعيط من غير ما يسألنى اي سؤال

معلش انا اسفة ان الموضوع قلب نكد كدا وانتوا متعودين منى علي الشقاوة
بس معلش سامحونى

الدور عليك يا ماجد يلا فضفض
هى عملت الى عليها وفضفضت يلا انت الى عليك الدور

واضح ان drnnonna تعبانة جدا ومخنوقة جدا من الكلية
بس انا بنصحك نصيحة ارمى كل حاجة ورا دهرك متفكريش فى حاجة دلوقتى غير مذاكرتك وبس
وحاول تتقربى من اصدقائك اكتر علشان يساعدوكى

مالك يا drnnonna واضح انك مضايقة اوى وزهقانة من الكلية والدراسة والطريقة الى ماشية بيها حياتك

حاولى تخففى الضغط عن نفسك بانك متفكريش فى الى مضايقك وتبصى على الحاجات الايجابية فى حياتك

زى مثلا انك هتتخرجى السنة دى وهتبقى دكتورة صيدلية قد الدنيا

واتبعى نصيحة just بالتقرب اكثر من الاصدقاء هما الى بيقدروا يخرجوا الواحد من اى ضيق وزعل

انا ان شاء الله هفضفض بس بعد ماجد

ميرسي يا just &ويا love
علي النصيحة الغالية دى
وانا فعلا بحاول اتقرب من ربنا ومش ابص للحاجات الصغيرة اللي بتزعل
وبجد شكرا علي ردودكم

بالنسبة لماجد شكله بيهرب من الفضفضه بس مش مشكلة
مستنياكم انتوا كمان تفضفضوا

يعنى انتى مصممه يا drnnonna على انى اشارك فى موضوعك ...... وواضح ان فى اجماع على كده كمان

اوك يا جماعه انا هفتحلكو قلبى وهقولكم على اللى جواه

انا الحمد لله سعيد فحياتى ومش بحاول افكر فاى حاجه تخلينى حزين او تضايقنى

انا زى معظم الشباب اللى فسنى حبيت طبعا قبل كده بس للاسف محصلش نصيب

وكنت داخل اليومين دول فحب جديد - واحده معانا فالكليه - بس تراجعت لاسباب احب احتفظ بيها لنفسى

اعتقد ان الخبر الاخير ده هيعجب ناس فالمنتدى ههههههههههههههههه

احب اشوف ردودكم .......... والدور عليك يا LOVE

ما هوا لازم كدا دبستنى ادبسك
خيرها في غيرها البنات مالين البلد هههههههههه

يالا يا love الدور عليك

يا love الدور عليك تفضفض والا هافضفض انا بالنيابة عنك

انت حر!!!!!

انا داخل النهاردة وهفتح قلبى ليكم.

اولا بالنسبة للدراسة كلنا زهقانين وتعبانين وقارفانين منها خصوصا لما الواحد يلاقى نفسه بيتعب ومش بيلاقى نتيجة تعبه وكليات تانية مش بيتعبه وبعدين يجيبوا تقدير زى تجارة مثلا.

ثانيا انا فى البيت مستريح جدا وبعمل الى انا عايزه لانهم واثقين فيا جدا وانا ووالدتى اصدقاء جدا وخصوصا بعد وفاة والدى الله يرحمه وانا فى اولى اعدادى .هى بتحكى ليا كل حاجة وانا نفس الشئ وعمرها ما اجبرتنى على حاجة وعلى فكرة انا وحيد يعنى معنديش اخوات.

نيجى بقى للموضوع الى بيهم ناس كتير وهى الحياة العاطفية انا محبتش بجد الا مرة واحدة فقط وده كان فى الصيف الى فات وحبتها فعلا وكنت بتمنى اكمل معاها حياتى ومستقبلى وبالفعل كنت داخل معاها على ارتباط رسمى فى الاجازة الجاية لكن حصلت ظروف احب احتفظ بيها لنفسى خلتنا نسيب بعض وحتى الان لسة متاثر بحبها ومقدرش انكر انى ساعات بحس انى لسة بحبها وساعات بحس انى نسيتها لما بفتكر الى هى عملته معايا لانه كان اول حب وكان حب حقيقى بس مكنش في نصيب.

حاليا فعلا انا بدور على الانسانة الى احبها وتحبنى وتنسينى الحب الى فات واكمل مع الانسانة دى بقية حياتى خصوصا انى لما بحب بدى الى بحبها حب كبير جدا واصحابى عارفين كدة.

وغلطتى فى الحب الاولانى انى حبيت زيادة عن اللزوم.

بتهيالى انا كدة قلت كل حاجة

ياشريف باشا يا حبيب قلبى و صديق عمرى

انا أكتر واحد عارفك وعارف كل حاجة عنك انا عاوز اقولك انها خسرت احسن انسان فى الدنيا ولازم تنساها وبسرعة لانها هى الخسرانة

الله يخليك يا طروق يا رفيق العمر والمستقبل ان شاء الله على الكلام الكبير والجميل الجامد ده

ربنا يعوضك باللي احسن منها وتلاقي اللي تتمناها

ويالا الدور علي مين؟
just
فين مشاركتك معانا؟؟

السلام عليكوا

انا جاى النهاردة افضفض بكلام كبير قوى

انا حبيت بجد مرتين المرة الأولى كانت لعب عيال وانا فى 3 اعدادى بس كانت اجمل بنت شفتها لغاية النهاردة كفاية اقول لكم انها شبة ريهام عبد الغفور بس محاولتش اكلمها فى الموضوع دة بالرغم انى كنت اعرفها وبتكلم معاها لانها كانت زميلتى فى الدرس المهم مش هطول عليكم هى كانت فترة وعدت

اما المرة التانية فكانت الحب الحقيقى بجد هى زميلتى فى الكلية اصغر منى ب3 سنين يعنى هى فى اعدادى هندسة وكمان اعرفها كويس جدا وصاحبتى لغاية دلوقتى لقيت فيها كل الحاجات اللى بدور عليها فى شريكة حياتى لدرجة انى قررت ولأول مرة انى اروح اقول لها كل اللى فى قلبى فرحت الأول لبنت خالتى اللى هى معايا فى دفعتى و اختى فى الرضاعة كمان وقلتلها على الموضوع علشان اخد رأيها

نسيت اقولكوا ان اللى انا حبيتها دى كان فيها عيب افضل احتفظ بية لنفسى لكن العيب دة كان السبب اللى خلانى اروح اقول لبنت خالتى الأول و اخد رايها فلقيتها قالتلى انها فعلا جميلة و كويسة بس قالتلى على نفس العيب اللى فى باللى

رأى بنت خالتى مع رأيى خلانى أتراجع تانى مرة تانية واقرر اننا نفضل اصحاب احسن بالرغم ان دة صعب عليا جدا

لكن بامانة انا لسة بحبها جدا لغاية دلوقتى و بأحاول اشوفها كل يوم فى الكلية على قد ما أقدر

اما بالنسبة للبنت اللى كنت حكيت عليها قبل كدة اللى كنت عايز اكلمها لقيت فيها بردة كل حاجة بس بتكمل كمان العيب اللى فى اللى حبيتها لكن دى مكلمتهاش قبل كدة و مش عارف صفاتها دة طبعا غير انى مش عارف اتعرف عليها لغاية دلوقتى

انا عارف انى طولت عليكوا قوى باختصار انا حبيت بجد مرة واحدة بس و لسة بحبها و بحب اشوفها و اتكلم معاها على قد مقدر لغاية النهاردة لكن مستحيل افكر اقولها على اللى فى قلبى

يظهر ياجماعة ان drnnonna قاعدة تستدرجنا فى الكلام و مقلتلناش لغاية دلوقتى اى حاجة عنها علشان كدة انا بأطالب و بشدة بالفضفضة اللى انا قصدى عليها

انا بضم صوتى لصوت just واطالب drnnonna بالفضفضة فى الحب لان فعلا كلنا اتكلمنا وهى الى مقترحة الموضوع مقلتش

واطالب باقى الاعضاء بالفضفضة

ايه يا just انت و love
انتوا اتفقتوا عليا
فضفضة ايه اللي عاوزين انى اقولها ؟
عن الحب في حياتى يعنى

هي كلمة واحدة "ما لقيتش الحب الحقيقي لحد الوقتى "
وان كنت اتخدعت فية مرة قبل كدا
واتمنى الاقيه وطبعا انتوا عارفين وضع البنت مهما كان بيختلف عن الولد في الكلام عن الموضوع دا بالذات
يارب ردى يرضيكم
وشكرا علي اهتمامكم santa

انا بصراحة مش مرضى اوى بس يلا مش مشكلة واتمنالك تلاقية

جه الور عليا بقى انى افضفض لان بجد نفسى اتكلم واخرج حاجات كتير جواى ومش هلاقى احسن منكم افضفض معاهم
الحمد لله انا عشت حياتى كلها طبيعى لحد ما والدتى توفت وانا داخل الجامعة ودى كانت نقطه تحول فى حياتى
لان كان كل اخواتى اتجوزوا وخلفوا ىكمان ومبقاش غيرى انا وبابا عيشين لوحدنا فى البيت وطبعا بظروف عمله فى القاهرة مش بييجى البيت الا خميس وجمعة ويسافر السبت
فلما دخلت الجامعة كنت بدور على الانسانه اللى كنت بحلم بيها وطبعا صفاتها مش اى صفات عشان انا لى مقياس فى اختيار البنت ولقيتها وعشت معاها ايام جميله جدا
لمدة سنه ونصف بس اكتشفت فى الاخر انها لا تصلح انها تكون زوجة مسؤله عنى وازاى تعرف تتعامل مع زوجها فنهيت الموضوع دة
وبعدها عشت فترة بسيطه فكرت فيها انى مرتبطش بحد تانى بس جت اللى غيرت حياتى 180 درجة وحسستنى انى انسان مستهتر وعايش حياتى غلط واتغيرت على ايديها
بس جت الرياح بما لا تشتهى السفن طبعا ولقيتها اتخطبت السنه دى بعد ما كنت عرفت عنها كل حاجة وكنت خلاص رايح اخطبها الصيف الجاى دة
انا دلوقتى حاسس انى رجعت تانى لايام الاستهتار وحاسس انى بضيع وقتى فى حاجات تافهة عشان البخ نفسى عن التفكير فى الموضوع دة
بس انا دلوقتى لما فكرت صح لغيت فكرة الارتباط دى خالص من حياتى الا لما اخلص واشتغل وبعدين يبقى الارتباط رسمى
انا طولت عليكم بس كنت محتاج اتكلم مع حد ينصحنى ويشور عليا
انا بقى عايز اسمع منكم انتوا كمان

احساس حلو قوى ان الواحد يلاقى اصدقاء يفضفض معاهم من غير قلق خالص وده اللى عمله احمد وعملناه احنا قبله

موضعك يا احمد انك عاوز تدور على الزوجه الصالحه ليك فالجامعه وده كويس وانا بايد الارتباط بدرى ولو بخطوبة

الحب شئ جميل محدش يقدر يقاومه وكل انسان بيعيش يحلم ويدور على الحب الحقيقى فحياته

احساس جميل قوى انك تحس بان حد مهتم بيك وبيخاف عليك بس هل هيستمر الحب ده ولا لا وياترى نهايته هتكون ازاى

اهلا بيك يا احمد معانا في الفضفضة
وربنا معاك يارب وتلاقي الانسانة اللي تحبك وتقف جنبك وتكون احسن ان شاء الله
بس انا بقولك نصيحة من اختك مش تشغل بالك بالحب وتدور عليه هايجى هايجى
بس استنى الحب اللي يجي في الوقت المناسب
وان شاء الله القدر هيقف جنبك وربنا هيقدر الحب دا
مش تستعجل واللي فات راح وعدى ومش تفكر فيه تانى
وحاول تحب احمد شوية ومش تهرب منه وتستهتر وانصاف الحلول دى
وادعي ربنا كتير عن سيدنا محمد -عليه الصلاة والسلام-"الدعاء يغير القدر"
يارب ما اكونش طولت عليك ويكون كلامى خفيف عليك

بص يا احمد احساس الحب جميل جدا وفعلا ممكن يغير فيك حاجات كتير غلط علشان الى بتحبه ميضعش منك

لكن الواحد ساعات لما بيضيع الحب منه ممكن يرجع تانى زى الاول او اوحش كمان من الاول

المفروض انت بقى متبقاش من النوعية دى ومتخليش ضياع الحب يضيعك انت شخصيا وتكون التجربة قوتك وذادتك خبرة انا عارف ان الموضوع صعب بس ده الى المفروض يحصل

انا مش مقتنع خالص ان الواحد يدور على الحب لانه مش هيبقى حب ,ده هيبقى الواحد بيقنع نفسه انه حب

لازم الحب هو الى يخبط على قلبك من غير ميعاد وتلاقى الى تخطف قلبك وتكون تستاهلك وتحافظ عليك وعلى اسمك وعلى اولادك فى المستقبل ان شاء الله .

والله يا جماعة انا متشكر جدا على ردودكم الجميله دى
اللى ممكن تكون دافع ليا للتغير
بس لعلمكم انا حاليا خلاص مش بدور على اى حاجة سيبها للظروف ومركز بس فى علاقاتى مع الناس وعلاقاتى مع اصحابى
ومركز كمان فى المنتدى
هههههههههههههههههههه

EXCELLENT MEMBER المساهمات : 42 تاريخ التسجيل : 08/04/2008

love_for_life كتب:: انا داخل النهاردة وهفتح قلبى ليكم.

اولا بالنسبة للدراسة كلنا زهقانين وتعبانين وقارفانين منها خصوصا لما الواحد يلاقى نفسه بيتعب ومش بيلاقى نتيجة تعبه وكليات تانية مش بيتعبه وبعدين يجيبوا تقدير زى تجارة مثلا.

ثانيا انا فى البيت مستريح جدا وبعمل الى انا عايزه لانهم واثقين فيا جدا وانا ووالدتى اصدقاء جدا وخصوصا بعد وفاة والدى الله يرحمه وانا فى اولى اعدادى .هى بتحكى ليا كل حاجة وانا نفس الشئ وعمرها ما اجبرتنى على حاجة وعلى فكرة انا وحيد يعنى معنديش اخوات.

نيجى بقى للموضوع الى بيهم ناس كتير وهى الحياة العاطفية انا محبتش بجد الا مرة واحدة فقط وده كان فى الصيف الى فات وحبتها فعلا وكنت بتمنى اكمل معاها حياتى ومستقبلى وبالفعل كنت داخل معاها على ارتباط رسمى فى الاجازة الجاية لكن حصلت ظروف احب احتفظ بيها لنفسى خلتنا نسيب بعض وحتى الان لسة متاثر بحبها ومقدرش انكر انى ساعات بحس انى لسة بحبها وساعات بحس انى نسيتها لما بفتكر الى هى عملته معايا لانه كان اول حب وكان حب حقيقى بس مكنش في نصيب.

حاليا فعلا انا بدور على الانسانة الى احبها وتحبنى وتنسينى الحب الى فات واكمل مع الانسانة دى بقية حياتى خصوصا انى لما بحب بدى الى بحبها حب كبير جدا واصحابى عارفين كدة.

وغلطتى فى الحب الاولانى انى حبيت زيادة عن اللزوم.

بتهيالى انا كدة قلت كل حاجة

بص يا شريف انا اكبر منك ب 9 سنين و علشان كده احب اقولك ان للاسف حبيبتك ممكن تحس بحبك ده و تندم عليه بس بعد فوات الاوان
لان للاسف برضه نادرا لما نلاقى اتنين يتلاقوا ببعض و يكون عندهم نفس درجة الاحساس و نفس مشاعر الحب الحقيقى و انا بقترح انك متستعجلش فى الارتباط باى واحدة و اصبر لان ممكن اللى تتمناه يتحققلك
ملحوظه انا بنت خالت نينو